Um 18 milljónir Úkraínumanna þurfa á neyðaraðstoð að halda í Úkraínu vegna innrásar Rússa í landið og eyðileggingarinnar af völdum stríðsins. Þetta segir Francesco Rocca, yfirmaður alþjóðasamtaka Rauða krossins.

Sky News hefur eftir Rocca að úkraínski Rauði krossinn hafi náð til 400.000 Úkraínubúa frá því að stríðið hófst og hafi getað látið þeim matvæli, bedda, teppi, tjöld og vatn í té.

Hann ræddi við fréttamenn í Genf og sagði að stríðið hafi áhrif á alla þá sem eru í Úkraínu.

Á sama fréttamannafundi sagði Jarno Habicht, hjá Alþjóðaheilbrigðismálastofnuninni WHO, að 74 árásir hafi verið gerðar á heilbrigðisstofnanir í Úkraínu og hafi 72 látist í þeim.