Ekstra Bladet fékk Anders Puck Nielsen, hernaðarsérfræðing við danska varnarmálaskólann, til að benda á þrjú stærstu mistök Pútín í tengslum við árásina.
Lélegar leyniþjónustuupplýsingar voru það fyrsta sem hann benti á. Hann sagði að Rússar hafi ekki unnið heimavinnuna sína hvað varðar upplýsingaöflun áður en þeir réðust inn í Úkraínu og að þeir hafi lagt rangt mat á úkraínskt samfélag. Ein stærstu mistökin séu vanmat á baráttuvilja og baráttugetu Úkraínumanna. „Þeir héldu að þeir væru að fara í litla hernaðaraðgerð, að varnir Úkraínumanna myndu ekki duga og að samfélagið myndi hrynja. Það gerðist ekki,“ sagði Nielsen.
Það næsta sem hann nefndi var að Rússar hafi lagt út í hernað án þess að vera með innrásaráætlun tilbúna. Þessu til stuðnings nefnir hann að fregnir hafi borist af að rússneski hermenn hafi lengi vel ekki vitað að þeir ættu að ráðast inn í Úkraínu. „Margt bendir til að þar til mjög seint í aðgerðinni hafi það verið leynilegt, líka innan hersins, að það ætti að gera innrás. Þeir hafa einfaldlega ekki gert nákvæma innrásaráætlun,“ sagði Nielsen.
Það þriðja sem hann nefndi til sögunnar eru léleg fjarskipti rússneska hersins og vandræði með birgðir og birgðaflutninga. Hann sagði að það hafi skort yfirsýn fyrir birgðamál og birgðaflutninga og það hafi gert Rússum erfitt fyrir: „Rússum hefur ekki tekist að tryggja að þeir gætu haldið bardögum áfram. Um leið og þeir voru komnir ákveðið langt inn í Úkraínu voru birgðaleiðirnar orðnar of langar og þeir urðu fljótt berskjaldaðir. Það hafði í för með sér að fremstu sveitir þeirra gátu ekki haldið dampi.“
Hann sagði að þeim hafi ekki tekist að tryggja flutninga á nauðsynlegustu birgðum til hersins. Til dæmis hafi það komið upp í upphafi innrásarinnar að brynvarin ökutæki urðu bensínlaus. Ekki hafi tekist að koma nægilegu eldsneyti, skotfærum og mat til fremstu hersveitanna og þetta sé vandi sem Rússar glími enn við, ekki síst vegna þess að Úkraínumönnum hafi tekist vel upp í að ráðast á birgðaleiðirnar.
