Kári Árnason yfirmaður knattspyrnumála hjá Víkingi segir að KSÍ hafi dregið lappirnar í viðræðum um að hann gerðist yfirmaður knattspyrnumála hjá sambandinu. Þetta kemur fram í Viðskiptablaðinu.

Kári sóttist eftir starfinu snemma árs og vildi taka við starfinu af Arnari Viðarssyni sem er enn með starfið þrátt fyrir að hafa verið A-landsliðs þjálfari karla í heilt ár.

„Ég átti afar góðar samræður við Guðna Bergsson, sem þá var formaður KSÍ, og Arnar [Þór Viðarsson]. Mér fannst eðlilegt að nýr maður myndi stíga inn í starf yfirmanns knattspyrnumála hjá KSÍ eftir að Arnar tók við sem aðalþjálfari, enda er það fullt starf og rúmlega það,“ segir Kári við Viðskiptablaðið í áhugaverðu viðtali.

„Ástæðan fyrir því að ég sótti um starfið er sú að fyrir mér þá verður einhver sem hefur verið í kringum landsliðið, sem hefur náð frábærum árangri á undanförnum árum, að gegna þessari stöðu. Það þarf ekkert endilega að vera ég, það getur allt eins verið einhver annar af mínum fyrrverandi liðsfélögum.“

Kári segir KSÍ hafa dregið lappirnar í viðræðunum og sökum þess hafi hann tekið starfið hjá Víkingi þegar það bauðst.

„Auk þess verður að gæta þess að þessi vitneskja sem varð til í þessari sögulegu velgengni hverfi ekki út úr sambandinu. Annars er landsliðið alltaf í einhverjum uppbyggingarfasa. Sem dæmi hefur oft verið talað um að yngja þurfi upp landsliðshópinn, sem er skiljanleg umræða. Það má þó ekki gleyma því að í A-landsliðinu snúast hlutirnir fyrst og fremst um að ná árangri. Ef það er með reglubundnum hætti verið að fá inn nýja þjálfara sem ekki tengdust landsliðinu meðan vel gekk og því ekki öðlast þekkingu á hvað þurfi til að vinna landsleiki, er hætta á því að sú kunnátta hverfi út úr sambandinu. Það er þetta sem ég hef áhyggjur af og þess vegna sótti ég um starfið.“