Donald Trump, fyrrum Bandaríkjaforseti, hafði rétt fyrir sér þegar hann hélt því fram að atkvæði látins fólks hefðu ratað í kjörkassana í forsetakosningunum 2020. En fjöldi slíkra atkvæða var hins vegar víðs fjarri því að vera jafnmikill og hann hélt fram. Hann sagði að atkvæði hefðu verið greidd fyrir 5.000 látna kjósendur í Georgíu en sá fjöldi er víðs fjarri því sem rétt er. Rétt er að fjögur slík atkvæði voru greidd.

Samkvæmt frétt The Guardian þá staðfestu embættismenn í Georgíu að atkvæði hafi verið greidd fyrir fjóra látna kjósendur í forsetakosningunum 2020.

Í öllum tilfellum voru það ættingjar hinna látnu sem greiddu atkvæði í þeirra nafni. Í einu tilfelli greiddi 74 ára ekkja atkvæði í nafni eiginmanns síns sem lést tveimur mánuðum fyrir kosningarnar. Donald Trump fékk atkvæðið. Lögmaður ekkjunnar segir að hún hafi vitað að eiginmaður hennar hafi viljað kjósa Repúblikana en sjálf er hún Demókrati. Hún viti núna að ólöglegt hafi verið að greiða atkvæði fyrir eiginmanninn.

En jafnvel þótt að Trump hefði haft rétt fyrir sér um fjölda atkvæða og þau hefðu öll fallið Joe Biden í hlut þá hefði það ekki breytt niðurstöðunni í Georgíu því Biden sigraði í ríkinu og fékk 12.000 fleiri atkvæði en Trump. Þetta var í fyrsta sinn síðan 1992 sem frambjóðandi Demókrata sigraði í ríkinu.