Íbúar í hjúkrunarheimilinu Skjólgarði á Höfn í Hornafirði hafa sent frá sér áskorun á nýjan heilbrigðisráðherra, Willum Þór Þórsson, og ríkisstjórn Katrínar Jakobsdóttur að ganga þegar í stað til samninga um byggingu nýs hjúkrunarheimilis.
Í áskoruninni, sem send var á helstu fjölmiðla landsins, er rakin sú saga hvernig framkvæmdum við viðbyggingu við hjúkrunarheimilið hafi átt að ljúka á þessu ári. Verkefnið hafi þó tafist og samkvæmt nýjustu áætlunum ætti þeim að ljúka 2023. Þær áætlanir hafa þó ekki gengið eftir því að tilboð sem bárust í útboð um verkið þóttu of dýr og framkvæmdir hafi í kjölfarið verið settar á ís.
Það segja íbúar hjúkrunarheimilisins að sé óforsvaranlegt og rekja síðan hvernig aðstæður þeirra eru á hjúkrunarheimilinu.
„Hér búum við öll nema tveir einstaklingar í tvíbýli með sameiginlegu baðherbergi með öðrum heimilismönnum. Herbergisfélagar okkar eru í fæstum tilfellum makar okkar eða nánir vinir frá fornu fari. Þessir tveir einstaklingar sem hafa sérbýli deila salerni án sturtu. Hér er rými til einkalífs það sama og ekkert,“ segir í bréfi íbúa.
Ef veita þarf íbúum persónulega þjónustu varðandi hreinlæti, lyfjagjafir, sáraumbúnað eða meðferðasamtöl er aðeins tjald á milli þess sem þiggur þjónustuna og nágrannans í næsta rúmi.
„Einstaklingar með einkenni heilabilunar hafa ekkert rými til að vera illa áttaðir í friði án þess að trufla aðra. Einstaklingar með hegðunarvanda hafa heldur ekkert rými til að forðast áreiti og fá útrás og geta því verið ógnandi og valdið öðrum kvíða og vanlíðan. Í herberginu okkar er sjúkrarúm, náttborð, lítinn fataskápur og sameiginlegur vaskur. Við getum komið með stól og e.t.v. eina litla kommóðu til að geyma okkur persónulegu muni eða til að reyna að hafa heimilislegt. Þessi skortur á rými veldur mörgum okkar kvíða og vanlíðan. Það er ekkert rými til að taka á móti gestum nema helst á rúmstokk. Það er ekki hægt að eiga trúnaðarsamtöl við starfsfólk því það er hvergi næði til þess. Þegar við liggjum svo banaleguna er herbergisfélagi okkar færður inn á baðherbergi svo við getum átt næði síðustu ævistundirnar með okkar ástvinum. Ef svo óheppilega vill til að herbergisfélagi okkar getur ekki farið inn á bað þá erum við færð þangað þar sem ástvinir okkar geta setið á klósettinu og kvatt okkur,“ skrifa íbúar.
Í febrúar á þessu ári tók Vigdísarholt ohf. við rekstri Skjólgarðs af sveitarfélaginu Hornafirði en hlutafélagið rekur hjúkrunarheimilin Sunnuhlíð í Kópavogi og Seltjörn á Seltjarnarnesi.
