Arnar Grétarsson verður áfram þjálfari KA í Pepsi Max-deild karla á næstu leiktíð. Félagið hefur staðfest þetta.

Arnar tók við KA um miðjan júlí í fyrra. Þá var liðið aðeins með 4 stig eftir sex umferðir í Pepsi Max-deild karla. Undir hans stjórn endaði KA í sjöunda sæti deildarinnar.

Í ár hefur gengi Akureyringa verið frábært. Liðið er í þriðja sæti með 39 stig þegar ein umferð er eftir.

KA mætir FH á Greifavellinum í lokaumferð Pepsi Max-deildarinnar á morgun. Vinni liðið þann leik tryggir það sér þriðja sæti deildarinnar, sem gæti gefið þátttökurétt í Evrópukeppni á næstu leiktíð.

,,Ekki einungis hefur Arnar leitt árangur liðsins innan vallar, sem verið hefur til fyrirmyndar, heldur hefur hann komið með sína miklu þekkingu á alþjóðlegri knattspyrnu inn í allt starfið í kringum knattspyrnudeild KA. Þannig er allt þjálfarateymið skipulagt til að þroska leikmenn og liðsheild þannig að bæði félagið sem og einstaklingar innan liðanna nái stöðugt að bæta sig,“ er á meðal annars sem stóð í yfirlýsingu KA um áframhaldandi veru Arnars.