Hjörvar Hafliðason, þáttastjórnandi í hlaðvarpsþættinum Dr. Football, sagði frá því í nýjasta þættinum að nokkrum stuðningsmönnum Víkings hafi verið bannað að vera með blys á leik liðsins gegn KR í Mjólkurbikarnum í vikunni.

Leikurinn var liður í 16-liða úrslitum keppninnar. Víkingur vann 3-1 og er kominn í 8-liða úrslit.

Nokkrir drengir mættu með blys á leikinn til að keyra upp stemmninguna. Hjörvar var hrifinn af því.

,,Þeir mættu með blys. Hvað er skemmtilegra en að vera að horfa á fótboltaleik og sjá reyk yfir vellinum? Þetta er bara ógeðslega gaman, gefur þessu svo ógeðslega mikið. Mönnum líður eins og á alvöru fótboltavelli ef einhver rífur upp blysin.“

Það voru þó ekki allir jafn hrifnir af þessu athæfi stuðningsmannanna.

,,Það er einhver töffari sem rífur upp blysið þegar þeir skora 1-0. Þá kemur einhver úr stjórninni ‘niður með þetta, slökkvið á þessu. 250 þúsund króna sekt.’ Af hverju er það alltaf þannig á Íslandi? Einhver 250 þúsund króna sekt.“

,,Af því að það er bannað að hafa gaman hérna,“ skaut Kristján Óli Sigurðsson, sérfræðingur í Dr. Football, þá inn í.

Albert Hafsteinsson, leikmaður Fram í Lengjudeildinni, var gestur í þættinum. Hann segir svona atriði geta verið ástæðuna fyrir því að stemmningin á íslenskum völlum er ekki meiri en raun ber vitni.

,,Þetta er kannski ástæðan fyrir því að stuðningurinn hefur aðeins dottið niður. Það má ekkert gera og það er gert grín að öllu alls staðar.“

,,Stuðningsmannamál á Íslandi eru í hörmulegum málum. Þarna komu viljugir gæjar sem voru þvílíkt til í að syngja og tralla og hafa gaman í Víkinni í gær. Vopnunum var  sparkað úr höndunum þeirra við fyrsta tækifæri,“ bætti Hjörvar við að lokum.

Afhverju heyrist ekki meira í Liverpool Samfélaginu fyrir mót? Allir heilir og allt klárt. Samt eru @BaldurKristjans og @SoliHolm óvenju yfirvegaðir.https://t.co/UZG7tNZFnD

— Dr. Football Podcast (@drfootballpod) August 13, 2021