Óskar Hrafn Þorvaldsson, þjálfari Breiðabliks, sagði eftir leik liðsins gegn Aberdeen í Sambandsdeildinni á fimmtudag að Scott Brown, miðjumaður skoska liðsins, væri einn virtasti eineltisseggur sem hann vissi um. Þá sakaði hann Joe Lewis, markvörð Aberdeen, um að haga sér eins og barn.

Aberdeen sló Blika út með því að sigra leikinn á fimmtudag 2-1. Þetta var seinni leikur liðanna í 3. umferð forkeppni Sambandsdeildarinnar. Aberdeen vann fyrri leikinn á Íslandi 2-3, einvígið því samanlagt 5-3.

Eftir fyrri leikinn gagnrýndi Óskar leikstíl Aberdeen harkalega. Hann sakaði þá um að reyna ekki að spila fótbolta og sagði einnig að hann hafi verið hissa á því hversu lélegir Skotarnir væru.

Eftir seinni leikinn skiptust leikmenn og þjálfarar liðanna svo á misvönduðum ummælum. Óskar var virkilega ósáttur með hegðun leikmanna Aberdeen.

,,Þeir komu að klefanum okkar og reyndu að komast inn. Þeir öskruðu að okkur ljótum orðum. Þeir voru virkilega ósáttir með það hvað ég sagði en að haga sér svona er barnalegt. Kannski voru orð mín of harkaleg en leikmenn Aberdeen eru fullorðnir menn.“

Óskar sneri sér svo að Brown og markverðinum, Lewis.

,,Scott Brown kom mér ekki á óvart. Hann er nú einn virtasti eineltisseggurinn. En það kom mér á óvart að 33 ára gamall markvörður þeirra hafa hagað sér eins og fimm ára barn. Scott Brown getur sagt það sem hann vill en hann má ekki koma inn í klefann okkar og áreita leikmennina okkar.“

Stephen Glass, þjálfari Aberdeen, var í viðtali eftir seinni leikinn og skaut aðeins á Óskar vegna ummæla þess síðarnefnda eftir leikinn á Íslandi,

,,Sumir hafa margt að segja og það hélt áfram eftir leik. Ég var ánægður með að við höfum ekki gagnrýnt frammistöðu hins liðsins. Ég er glaður með að við höfum náð okkar fram á vellinum. Við vorum ekki upp á okkar besta en við erum komnir áfram í næstu umferð. Ég vona að þeir hafa notið ferðalagsins til Aberdeen.“