Mirror tók saman lista yfir níu leikmenn Manchester United sem þykja ólíklegir til að vera í hóp gegn Leeds í fyrsta leik liðanna á nýju tímabili.
Ole Gunnar Solskjaer og hans menn þykja líklegir til að gera atlögu að titlinum og binda enda á fjögurra ára titlaþurrð en félagið vann síðast titil árið 2017 undir stjórn Jose Mourinho. United fékk Jadon Sancho til félagsins í sumar á 73 milljónir punda og búist er við komu varnarmannsins Raphael Varane frá Real Madrid á næstu dögum.
United hefur gengið illa að losa sig við leikmenn og hópurinn orðinn ansi stór en þar eru meðal annars leikmenn sem hafa lítið spilað á undanförnum árum og eiga ef til vill ekki framtíðina fyrir sér hjá félaginu.
Þeir Tom Heaton, Eric Bailly, Alex Telles, Phil Jones, Juan Mata, Andreas Pereira, Jesse Lingard, Marcus Rashford og Edison Cavani þykja allir ólíkegir til að vera í hóp um helgina.
Fyrstu sex leikmennirnir á listanum verða annað hvort seldir eða í aukahlutverki á tímabilinu en Marcus Rashford er fjarverandi vegna meiðsla og Edison Cavani fékk langt frí eftir Suður-Ameríkukeppnina og missir af fyrsta leiknum gegn Leeds.
Jesse Lingard greindist með Covid og missti af síðasta leik undirbúningstímabilsins gegn Everton en framtíð hans hjá klúbbnum er enn óráðin.
