Elvar Örn Friðriksson, framkvæmdastjóri Verndarsjóðs Villtra Laxastofna eða North Atlantic Salmon Fund (NASF), er ekki sáttur með viðbrögð Arctic Fish og Matvælastofnunar (MAST) vegna mynda sem kajakræðarinn Veiga Grétarsdóttir tók af fiskum í sjókvíaeldi frá fyrirtækinu. Hann ræðir þessi viðbrögð í pistli á Vísi. 

Líkt og DV greindi frá sendi Arctic Fish frá sér yfirlýsingu í gær þar sem Veiga var sökuð um brot sóttvarnareglum sem varða sjókvíaeldissvæði. Þeir vilja meina að fólk sem ekki fær leyfi frá fyrirtækinu til að fara að stöðvunum geti mögulega borið með sér sýkingar úr öðrum fjörðum.

Sjá einnig: Arctic Fish sakar Veigu um brot á sóttvarnareglum – Afmyndaðir fiskar í sjókvíaeldi

Í dag birtist frétt á bb.is þar sem sérfræðingur hjá MAST gagnrýnir Veigu fyrir að brjóta sóttvarnareglur. Ekkert er minnst á ástand fiskanna. Elvar Örn segir þessi vinnubrögð vera fráleit.

„MAST er sú stofnun sem sér um eftirlit með sjókvíaeldi. Í svari sínu minnist MAST ekkert á ástand fiskanna eða hvort að stofnuninni þyki í lagi að svona viðgangist í íslensku sjókvíaeldi. Einungis er hlaupið undir bagga með sjókvíaeldisfyrirtækjunum og Veiga sökuð um brot á sóttvarnarreglum. Í stað þess að rannsaka hvað hefur farið úrskeiðis og hvort allt sé með feldu í sjókvíunum, þá ákveður stofnunin að fara í fjölmiðla og gagnrýna konuna sem var svo hugrökk að þora að sýna Íslendingum það sem leynist undir yfirborðinu,“ segir í pistli Elvars.

Hann vill meina að með þessum viðbrögðum séu sjókvíaeldisfyrirtækin að skjóta sendiboðann en Arctic Fish hefur einnig sagt að þeir efist um að myndirnar séu úr kvíum frá þeim. Í pistli Elvars kemur einnig fram að 1.350.000 eldislaxar hafi drepist í íslenskum sjókvíum það sem af er ári.

„Væri ekki nær að líta í eigin barm, taka ábyrgð á gjörðum sínum og bera virðingu fyrir íslenskri náttúru, eldislaxi jafnt sem villtum íslenskum laxi? Myndirnar eru ótvíræður vitnisburður um að sjókvíaeldi á laxi er ótæk aðferð við dýrahald og matvælaframleiðslu. Stjórnvöldum ber skylda til að vinda ofan af þeirri starfsemi sem fyrst og beina öllu fiskeldi í lokuð kerfi,“ spyr hann að lokum.