Dietmar Hamann, fyrrum leikmaður Liverpool, telur að Manchester United nái hugsanlega ekki Meistaradeildarsæti á næstu leiktíð í ensku úrvalsdeildinni sem hefst á föstudaginn næstkomandi. Hann telur að Leicester steli því af United.

Manchester United endaði í 2. sæti deildarinnar á síðasta tímabili og hefur liðið styrkt sig töluvert fyrir komandi leiktíð. Jadon Sancho og Raphael Varane hafa báðir skrifað undir hjá félaginu. Hamann telur þó að Leicester gæti náð Meistaradeildarsæti á kostnað Manchester United og að félagið síðarnefnda sé ekki öruggt með að enda í topp fjórum í deildinni.

„Manchester United er ekkert öruggt með að enda í topp fjórum. Ég er alveg sammála þeim sem segja að Solskjaer myndi ekki fá starf hjá öðrum toppklúbbi, hann þarf að sanna sig,” sagði Hamann við British Gambler.

„Jadon Sancho mun bæta liðið en tapið í úrslitaleik Evrópudeildarinnar situr enn í fólki og lætur mann efast um þá.”

„Ég tel að Leicester gæti jafnvel endað fyrir ofan þá og náð í topp fjóra.”