Enski framherjinn Michael Bakare gekk til liðs við Fjölni á dögunum. Hann hefur spilað tvo leiki fyrir félagið í Lengjudeildinni. Hann var frábær í síðasta leik gegn Þrótti Reykjavík. Þar skoraði hann og lagði upp í 3-1 sigri.

Bakare var þá til umræðu í markaþætti Lengjudeildarinnar á Hringbraut í gærkvöldi. Hrafnkell Freyr Ágústsson, sérfræðingur þáttarins, er virkilega hrifinn af þessum 34 ára gamla leikmanni.

,,Hann breytir Fjölnisliðinu bara að öllu leyti því það sem Fjölni hefur vantað í sumar er leikmaður sem getur búið eitthvað til upp úr engu. Hann er klárlega sá gæi,“ sagði Hrafnkell og bætti við ,,Bakare getur verið á milli þess að Fjölnir fara upp eða lendi í þriðja eða fjórða sæti.“

Það kom fram í útvarpsþættinum Fótbolti.net um helgina að umboðsmaður Bakare hafi reynt að koma honum til Íslands í mörg ár en að enginn hafi sýnt áhuga fyrr en nú. Það virðist hafa verið hárrétt ákvörðun hjá Fjölni að sækja framherjann, sem hefur aðallega spilað í neðstu deildum Englands á ferlinum.

,,Hann er vel fljótur, hann er góður á boltann, teknískur, ógeðslega skemmtilegur leikmaður. Þetta er leikmaður sem við viljum sjá á Íslandi, láta mann stíga upp úr sætinu,“ sagði Hrafnkell.

Hörður Snævar Jónsson, þáttastjórnandi, segir Bakare hafa minnt á Búlgarann Dimitar Berbatov er hann lagði upp seinna mark Fjölnis í leiknum gegn Þrótti.

,,Minnir mig nú pínulítið á Dimitar Berbatov hvernig hann fíflar varnarmennina.“

Hér fyrir neðan má sjá umræðuna um Bakare sem og markaþátt Lengjudeildarinnar í heild sinni.