Formaður Sassuolo, Giovanni Carnevali, sagði við Sky Italia að félagið væri komið langt í viðræðum við félag utan Ítalíu vegna miðjumannsins Manuel Locatelli.
Locatelli hefur átt flott Evrópumót með ítalska landsliðinu og hefur í kjölfarið verið orðaður við stærri lið.
Arsenal og Juventus hafa helst verið nefnd til sögunnar. Hingað til hefur þó þótt líklegast að Locatelli endi hjá Juve.
Nú er hins vegar útlit fyrir að svo verði ekki, miðað við hvað Carnevali segir.
,,Við erum í viðræðum um Locatelli við erlent félag, þær eru komnar mjög langt,“ sagði formaðurinn.
Hvort að um Arsenal sé að ræða er ekki á hreinu. Það er hins vegar það félag utan Ítalíu sem Locatelli hefur mest verið orðaður við.
