Jóna María Hafsteinsdóttir auglýsti sófa sem hún var að gefa í gegnum hinn vinsæla Facebook-hóp Gefins, allt gefins en par hafði áhuga á sófanum og mætti heim til hennar til að sækja sófann. Þegar parið mætti á staðinn skoðaði maðurinn sófann, mældi hann út en svo hættu þau við að fá hann vegna „flutningsvandræða“.

Þegar parið var farið sá Jóna að parið hafði stolið af heimilinu Bluetooth-hátalara, seðlaveski og hreindýrahornsstyttu. Konan hafði stolið þessu á meðan maðurinn var að mæla út og skoða sófann.

Vísir greindi frá málinu og ræddi við Jónu Maríu um það. „Maður fær bara sjokk þegar þetta er gert svona beint fyrir framan mann,“ segir Jóna í samtali við blaðamann Vísis. „Ég ætlaði að hjálpa þessu fólki og gefa því eitthvað og það kemur inn og stelur öllu steini léttara. Ég varð síðan auðvitað alveg brjáluð af því að þessi stytta hafði mikið tilfinningagildi fyrir mér.“

Þá segir Jóna að atburðir sem þessir geri það að verkum að traust fólks minnki, hún mun til að mynda aldrei gefa hluti sína aftur. „Ef einhver sem ég þekki getur ekki notað það fer það héðan í frá bara beinustu leið á haugana,“ segir Jóna og varar fólk við að hleypa fólki inn á heimili sitt í gegnum Facebook-hópa sem ganga út á að gefa hluti. Þá hvetur hún fólk til að færa húsgögn út úr húsinu áður en þau eru gefin í gegnum Facebook-hópa.