Liverpool vonast enn til þess að Mohamed Salah verði ekki valinn í landsliðshóp Egypta fyrir Ólympíuleikana. Þjálfari Egypta og stórnarformaður knattspyrnusambands Egypta biðla til Liverpool að leyfa honum að fara á mótið.
U-23 ára lið Egypta tekur þátt á mótinu en þrír eldri leikmenn verða leyfðir og vilja Egyptar að Salah verði einn af þeim.
Ef Salah tekur þátt á Ólympíuleikunum í Tokyo í ágúst þá missir hann af stærstum hluta undirbúningstímabilsins með Liverpool. Mótið hefst 22. júlí og úrslitaleikurinn fer fram 7. ágúst og enska úrvalsdeildin hefst viku seinna.
„Við munum reyna einu sinni enn að tala við Liverpool til þess að leyfa honum að fara. Hann vill spila á Ólympíuleikunum og við viljum láta það gerast,“ sagði Ahmed Megahed, formaður knattspyrnusambands Egypta við ONTime Sports.
„Salah er stórstjarna og allir vilja hafa hann þarna.“
