Valur var í pottinum þegar dregið var í fyrstu umferð undankeppnar Meistaradeildarinnar í dag. Drátturinn var þeim ekkert voðalega hagstæður en þeir fengu króatíska liðið Dinamo Zagreb. Þeir hafa unnið króatísku deildina nú fjögur ár í röð en síðan tímabilið 2005-2006 hefur liðið einungis einu sinni ekki unnið deildina.
Fyrri leikurinn fer fram í Zagreb annaðhvort 6. eða 7. júlí og sá seinni á Origovellinum 13. eða 14. júlí.
Liðin sem enduðu í 2.-4. sæti á seinasta tímabili taka öll þátt í Sambandsdeildinni. Einnig var dregið í hana í dag og fengu FH og Stjarnan írska mótherja. FH mætir Sligo Rovers en Stjarnan Bohemian. Breiðablik fær að kíkja til Lúxemborg og mæta Racing FC Union Lëtzebuerg.
FH og Stjarnan leika fyrri leikinn á heimavelli en Blikar á útivelli. Fyrri leikurinn fer fram 8. júlí en seinni leikurinn viku seinna eða 15. júlí.
