Peter Schmeichel fyrrum markvörður Dana segir að UEFA hafi hreinlega hótað leikmönnum Dana nokkrum mínútum eftir að Christian Eriksen fékk hjartaáfall.

Liðslæknir danska landsliðsins, Morten Boesen, hefur staðfest að Christian Eriksen hafi farið í hjartastopp í gær. Eins og flestir, ef ekki allir, vita þá hneig Christian Eriksen niður í leik með danska landsliðinu gegn Finnlandi á Evrópumótinu á laugardag. Hann andaði hvorki né var með púls um tíma og þurfti læknalið að beita hjartahnoði. Til allrar hamingju komst Eriksen þó aftur til meðvitundar og gat bæði talað og andað eftir að hafa verið fluttur á sjúkrahús.

Nú er komið í ljós að hjarta Eriksen stöðvaðist í leiknum. ,,Hann var farinn. Við náðum honum til baka. Hversu nálægt því vorum við að missa hann? Ég veit það ekki,“ sagði Boesen.

Leikurinn fór aftur af stað og voru Danir ekki í neinu standi til að spila fótbolta, unnu Finnar 1-0 sigur. „UEFA sagði að leikmennirnir hefðu krafist þess að spila, ég veit að það er ekki satt,“ sagði Schmeichel en sonur hans Kasper ver mark Dana í dag.

„Leikmennirnir fengu þrjá kostu, einn af þeim var að spila strax og klára þessar 50 mínútur. Annar kosturinn var að spila í hádeginu í gær og hinn kosturinn var að gefa leikinn og tapa honum 3-0.“

„Þið sjáið það bara svart á hvítu. Var það ósk leikmanna að spila stax? Höfðu þeir eitthvað val? Ég held ekki. Þú heyrði svo frá þjálfaranum degi eftir leikinn, hann sá eftir því að hafa spilað leikinn þarna.“