Síðan #MeToo bylgjan sem hefur verið í gangi undanfarið hófst hefur það verið mikið í umræðunni hvort fólk eigi að hætta að fylgja þeim sem ásakaðir eru um ofbeldi. Hefur þetta verið mikið hitamál meðal fólks á samfélagsmiðlum og eru ekki allir sammála um það hvort fólk eigi að halda áfram að fylgja meintum gerendum á samfélagsmiðlum eða ekki.

Sólborg Guðbrandsdóttir, söngkona, laganemi, fyrirlesari og aktívisti, hefur til að mynda verið harðlega gagnrýnd fyrir að fylgja einstaklingum sem hafa verið mikið í umræðunni undanfarið vegna ásakana um ofbeldi. Einstaklingarnir sem um ræðir eru til dæmis tónlistarmaðurinn Auður og fjölmiðlamaðurinn Sölvi Tryggvason en báðir hafa þeir verið ásakaðir um ofbeldi á samfélagsmiðlum í nýju #Metoo bylgjunni.

„Þið þurfið ekkert að vita um mín kynni við annað fólk“

Nokkrir netverjar hafa gagnrýnd Sólborgu harðlega fyrir að fylgja þessum mönnum og fleirum opinberum einstaklingum sem sakaðir hafa verið um ofbeldi. „Hey Sólborg af hverju ertu að followa þekkta gerendur á Instagram?“ spyr til að mynda einn netverji. „Af hverju þarft þú svar við því?“ spyr Sólborg þá á móti.

Annar netverji spyr Sólborgu hvers vegna hún fylgir meintum gerendum á samfélagsmiðlinum. „Af hverju ert þú að grandskoða það hverjum ég fylgi á samfélagsmiðlum?“ segir Sólborg við því. „Af hverju svararu ekki með ástæðunni ef þér finnst það réttlætanlegt? Í staðinn fyrir bara „kemur þér ekki við“,“ segir netverjinn þá til baka.

„Ég skulda ykkur enga útskýringu. Þið þurfið ekkert að vita um mín kynni við annað fólk,“ segir Sólborg þá. „Þú ert að taka þátt í umræðunni. Þú ert að taka þátt og ert að vera hávær. Þú getur svo ekki valið um hvað þú ert tilbúin í að tala um og brugðist illa við þegar að það er questionað hluti sem að þú ert að gera,“ segir netverjinn að lokum.

„Þú ert með highlights i story á instagrammi með 31 þúsund followers sem þú skírðir „þögnin rofin“ og ert að styðja fólk sem er að senda persónulega á þig um kynferðislegt áreitni og ert að styðja þau, en ert svo að followa alla helstu þekkta gerendur íslands? Make it make sense,“ segir síðan annar netverji en ljóst er að þarna er talað um Sólborgu og Instagram-síðu hennar, Fávitar, en síðan hefur hlotið mikið lof fyrir kynfræðslu og vitundarvakningu um ofbeldi í samfélaginu hér á landi.

Uppfært: 11:22

Sólborg hefur nú tjáð sig aftur um málið á Twitter-síðu sinni. Hún segir að það sé hlægilegt að verið sé að rífa hana niður eftir að hún hefur eytt nánast hverjum degi undanfarin ár í að tala um málefnið. Þá veltir hún því fyrir sér hvers vegna verið sé að ætlast til þess að fólk hætti að fylgja gerendum á samfélagsmiðlum.

„Höfum það svo algjörlega á hreinu. Ég þekki bæði þolendur og gerendur. Ég er búin að verja mörgum, mörgum klukkustundum í að tala við gerendur um hegðun sína í fortíðinni seinustu vikur. Það er ekki vegna þess að mér þykir það gaman heldur tek ég það á chestið. En þið?“ segir Sólborg til að mynda í einni færslunni sem hún birtir vegna málsins en hér fyrir neðan má sjá færslurnar.

Ætlið þið að nafngreina alla 60 þúsund einstaklingana á Twitter sem follow-a þá líka eða bara að reyna að rífa niður eina sem hefur varið nánast hverjum degi seinustu 5 ár í að breyta stöðunni?😂

Hilarious.

— Sólborg Guðbrands (@solborgg) June 9, 2021

„Fólk sem þekkir gerendur…

…þið verðið sko að unfollowa á Insta og Twitter. Sýna samstöðu! Nafngreina þá í tweeti og taka afstöðu með þolendum. Ekki vera vinir þeirra en takið samt samtalið við þá í einrúmi. Lokið á þá en EKKI samt gera EKKI neitt.”

??????? 🤔🤳🏼

— Sólborg Guðbrands (@solborgg) June 9, 2021

Að reyna að bully-a fólk út í horn með nafngreiningum til að hlýða því sem ykkur finnst rétt að gera í stöðunni en vera á sama tíma að kalla eftir virðingu í samskiptum og mikilvægi þess að við virðum mörk fólks?????

Þið.Stjórnið.Ekki.Öðru.Fólki.

— Sólborg Guðbrands (@solborgg) June 9, 2021

Höfum það svo algjörlega á hreinu. Ég þekki bæði þolendur og gerendur. Ég er búin að verja mörgum, mörgum klukkustundum í að tala við gerendur um hegðun sína í fortíðinni seinustu vikur. Það er ekki vegna þess að mér þykir það gaman heldur tek ég það á chestið. En þið?

— Sólborg Guðbrands (@solborgg) June 9, 2021

Það er svo augljóst að það er enginn tilbúinn til þess að tækla og ræða og reyna að skilja gerendur. Og meira að segja þeir sem reyna fá skammir.

Ég skil reiðina 100% en hvert er planið? Að geyma þá ofan í skúffu og loka?
Þetta er skrímslavæðingin sem þið eruð sjálf að gagnrýna.

— Sólborg Guðbrands (@solborgg) June 9, 2021

DV reyndi að ná í Sólborgu við vinnslu fréttarinnar en án árangurs.