Íslenska karlalandsliðið gerði jafntefli við það pólska á útivelli í dag. Frammistaðan heilt yfir var góð og var Ísland nálægt því að sigra.

Ísland spilaði vel í fyrri hálfleik. Á 20. mínútu fékk Birkir Bjarnason færi til að koma liðinu í forystu eftir að Aron Einar Gunnarsson hafði unnið boltann vel af varnarmanni Pólverja. Skot Birkir fór þó rétt framhjá.

Albert Guðmundsson kom Íslandi yfir á 24. mínútu leiksins með flottri hælspyrnu. Guðmundur Þórarinsson tók þá hornspyrnu sem rataði á Aron Einar, hann sparkaði í átt að marki þar sem Albert kom boltanum í netið af stuttu færi. Fyrst var að vísu dæmt rangstaða en eftir að hafa tekið sér langan tíma ákváðu dómarar að skoða myndbandsdómgæsluna. Þar komust þeir réttilega að því að Albert hafði verið réttstæður.

Tíu mínútum síðar jafnaði Pietr Zielenski fyrir heimamenn. Hann skoraði þá eftir fyrirgjöf sem fór framhjá íslensku varnarmönnunum.

Staðan í hálfleik var 1-1.

Brynjar Ingi Bjarnason kom Íslandi aftur yfir í upphafi seinni hálfleiks með glæsilegu skoti eftir fyrirgjöf Guðmundar. Brynjar fer virkilega vel af stað með landsliðinu.

Pólverjar ógnuðu lítið lengst af í seinni hálfleik og hélt íslenska liðið þeim vel í skefjum.

Í lok leiks fóru þeir þó að gera sig hættulega og það endaði með því að Karol Swiderski jafnaði á 88. mínútu. Grátlegt að halda ekki út. Lokatölur urðu 2-2.