Á sjöunda tímanum í gær stálu tveir menn, sem voru í annarlegu ástandi, vörum úr lyfjaverslun í Kópavogi og hlupu út með þær. Starfsmaður hljóp á eftir þeim og náði vörunum af þeim en mennirnir réðust á starfsmanninn og rifu í fatnað hans og slógu ítrekað í andlitið. Málið er í rannsókn.

Á níunda tímanum í gærkvöldi var ökumaður sviptur ökuréttindum til bráðabirgða eftir að hraði bifreiðar hans mældist 109 km/klst í Grafarvogi, á vegarkafla þar sem leyfður hámarkshraði er 50 km/klst.

Á áttunda tímanum í gærkvöldi var tilkynnt um sofandi mann í bifreið við verslun í Garðabæ. Hann vaknaði ekki þegar vegfarendur reyndu að vekja hann og var í fyrstu talið að hann væri veikur. Hann reyndist vera í annarlegu ástandi og með ætluð fíkniefni í höndunum þegar lögreglan kom að honum. Hald var lagt á fíkniefnin og kveikjuláslykla bifreiðarinnar.

Fimm ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna. Einn þeirra er grunaður um sölu fíkniefna og var hann vistaður í fangageymslu vegna rannsóknar málsins.