Tveir leikmenn Manchester City, Raheem Sterling og Kyle Walker, urðu fyrir kynþáttaníði á samfélagsmiðlum eftir tap Manchester City gegn Chelsea í úrslitaleik Meistaradeildarinnar í gærkvöldi.
Í frétt Sky Sports segir að báðir leikmenn hafi fengið ýmis apatákn (e. emoji) send á Instagram eftir leikinn. Er þetta svipað og Marcus Rashford lenti í eftir tap Manchester United gegn Villareal í úrslitaleik Evrópudeildarinnar á miðvikudaginn.
Sterling hefur mikið látið í sér heyra vegna kynþáttaníði sem fótboltamenn verða stöðugt fyrir.
Sportsmail hefur reynt að ná sambandi við Facebook, eigendur Instagram, vegna málsins. Þegar Manchester City sigraði PSG í undanúrslitum fékk Sterling send ýmis rasísk skilaboð og þá fjarlægði Instagram þau og sagðist ætla að gera eitthvað í málinu.
Walker fékk einnig send rasísk skilaboð eftir að hafa unnið Carabao bikarinn í Englandi í Apríl.
Mikil óánægja er með hvað samfélagsmiðlarnir geri lítið til þess að stoppa kynþáttaníði. Uppi hefur verið sú umræða að þeir sem stofni aðgang þurfi að vera með persónuskilríki að baki svo að hægt sé að rekja öll ljót skilaboð aftur til þeirra sem skrifa þau.
