Vinnumálastofnun hefur heimild til að miðla ferilskrám atvinnuleitenda til atvinnurekenda.
„Allir umsækjendur um atvinnuleysistryggingar eru upplýstir um það að Vinnumálastofnun kann að miðla upplýsingum til atvinnurekenda. Allir atvinnuleitendur staðfesta ennfremur að Vinnumálastofnun sé heimilt að miðla upplýsingum sem fram koma í umsókn um atvinnu og að þær séu nýttar við atvinnumiðlun og veittar atvinnurekendum vegna starfstilboða,“ segir í svari frá Vinnumálastofnun vegna fyrirspurnar DV um heimild stofnunarinnar til að miðla upplýsingum til þriðja aðila og hvort atvinnuleitendur séu upplýstir um þessa heimild.
Þá er staðfest að stofnuninni hafa borist kvartanir frá atvinnuleitendum þar sem þeir telja, ranglega, að brotið hafi verið á persónuvernd sinni.
„Ótrúlegt að þetta geti viðgengist“
Í Kastljósi á fimmtudagskvöld var fjallað um stöðu ferðaþjónustunnar. Bjarnheiður Hallsdóttir, formaður Samtaka ferðaþjónustunnar og Þórdís Kolbrún Reykfjörð Gylfadóttir, ferðamálaráðherra, sátu fyrir svörum og sögðust báðar kannast við að erfitt sé að manna stöður í ferðaþjónustunni fyrir sumarið.
Bjarnheiður sagði: „Ég er að heyra þetta frá þó nokkrum kollegum. Þeir eru semsagt að leitast við að ráða fólk sem er á atvinnuleysisbótum núna, fá lista frá Vinnumálastofnun og hringja síðan í þetta fólk og það bara gengur vægast sagt mjög illa. Það er annað hvort ekki svarað í símann eða þá að svörin eru þau að fólk hafi ekki áhuga á að taka vinnuna eða þá að fólk segir einfaldlega að, eða réttara sagt að atvinnurekandi fær ekki einu sinni að bera upp erindið, um hvers konar vinnu er að ræða eða hvaða laun, svarið er einfaldlega það að viðkomandi hafi ekki áhuga á vinnu. Þetta er auðvitað hræðileg staða og ótrúlegt að þetta geti viðgengist í okkar samfélagi í dag.“
DV sendi Vinnumálastofnun fyrirspurnina í framhaldinu.
Miðlun á ferilskrám
„Með umsókn um atvinnuleysisbætur sækir atvinnuleitandi einnig um aðstoð við atvinnuleit auk þátttöku í vinnumarkaðsaðgerðum. Samkvæmt 2. mgr. 7. gr. laga nr. 55/2006 um vinnumarkaðsaðgerðir felur umsókn um þátttöku í vinnumarkaðsaðgerðum í sér skráningu hjá vinnumiðlun Vinnumálastofnunar og beiðni um aðstoð ráðgjafa stofnunarinnar við atvinnuleit,“ segir í svari Vinnumálastofnunar.
Ennfremur kemur þar fram: „Vinnumálastofnun er gert að miðla upplýsingum um laus störf til atvinnuleitenda og veita þeim aðstoð við að finna störf við hæfi. Eitt af skilyrðum fyrir greiðslu atvinnuleysistrygginga er að vera virkur í atvinnuleit, vera reiðubúinn að taka starfi og hafa vilja og getu til að taka þátt í vinnumarkaðsúrræðum sem standa til boða. Vinnumálastofnun veitir einnig aðstoð við að koma á sambandi milli atvinnuleitanda og þess atvinnurekanda sem óskar eftir starfsmanni ef ljóst er atvinnuleitandi uppfylli skilyrði starfslýsingar. Í 3. mgr. 10. gr. laga um Vinnumarkaðsaðgerðir segir: „Vinnumálastofnun skal jafnframt aðstoða atvinnurekendur sem leita eftir almennum upplýsingum um framboð á vinnuafli eða aðstoð við ráðningu starfsfólks.“ Tilvitnað ákvæði er grundvöllur miðlunar á ferilskrám atvinnuleitenda til atvinnurekenda og forsenda fyrir virkri vinnumiðlun stofnunarinnar.“
Nánari upplýsingar um miðlun persónuupplýsinga hjá stofnuninni er einnig unnt að nálgast með því að smella hér.
