Alfreð Finnbogason og Jóhann Berg Guðmundsson gáfu ekki kost á sér í íslenska landsliðið vegna meiðsla sem hafa hrjáð þá. Þetta kom fram á fréttamannafundi sem Arnar Þór Viðarsson landsliðsþjálfari hélt nú í morgun.
Landsliðshópurinn fyrir leikina gegn Mexíkó, Færeyjum og Póllandi var kynntur á föstudag. Venjan er að halda fréttamannafund samdægurs en andlát í fjölskyldu Arnars Þórs Viðarssonar var ástæða þess að fundinum var frestað.
Gylfi Þór Sigurðsson gaf heldur ekki kost á sér en Arnar Þór var spurður út í málið á fundinum í dag.
„Samtölin voru mjög góð, við töluðum við þá. Við vildum fá sem flesta, síðan förum við í það að tala við þá einstaklinga hvern fyrir sig. Ég skil mjög vel útskýringar frá hverjum og einum, þeir eru allir með sínar ástæður fyrir að koma ekki. Þær eru mismunandi eins og fólk er mismunandi, sem fyrrverandi leikmaður og manneskja þá skil ég allar ástæðurnar mjög vel. Er ég sammála þeim að þeir komi ekki? Nei, ég vil fá þá sem þjálfara. Við viljum fá þá sem þjálfarar, vildum fá þá í þetta verkefni,“ sagði Arnar Þór um málið.
„Það væri óeðlilegt ef við myndum sitja hér og segja að það skipti engu máli að þeir kæmu ekki, við vildum fá sem flesta af þessum leikmönnum. Styðja við þessa yngri og þróa okkar lið, við erum að fara í mikilvægan glugga í september og október. Við höfum ekki mikinn tíma til að þróa liðið í þessari undankeppni fyrir HM, það er staðreynd. Við skiljum þá en vildum fá þá alla.“
Alfreð Finnbogason lék aðeins 534 mínútur í þýsku úrvalsdeildinni á þessu tímabili og vill ná heilsu áður en hann fer á fullt með landsliðinu. „Alfreð hefur verið meiddur, hann þarf að finna sitt form aftur,“ sagði Arnar um fjarveru framherjans öfluga.
Jóhann Berg hefur glímt við talsvert af meiðslum síðustu ár en er heill heilsu þessa dagana. „Jói er búinn að vera meiddur og er að koma til baka, var hálf meiddur í mars glugganum þegar hann kom til okkar. Við kunnum að meta að hann hafi komið, hann vill ná sér almennilega og ná sínu flugi aftur, eins og hann var alltaf.“
Ástæður Gylfa eru persónulegar að sögn Arnars en hann varð faðir í fyrsta sinn á dögunum, fyrsta barn hans og Alexöndru Helgu Ívarsdóttur var einnig ástæða þess að Gylfi gaf ekki kost á sér í verkefni landsliðsins í mars.
„Gylfi er með persónulegar ástæður, við eigum allir fjölskyldu og börn. Við vitum allir hvernig lífið er fyrir utan fótboltann, ég skil það mjög vel en ég er alls ekki sammála því.“
