Harry Maguire, viðurkenndi nýlega í hlaðvarpi að gagnrýni frá þeim sem fjalli um leiki liðsins fari í taugarnar á leikmönnum Manchester United.

Harry Maguire hefur verið lykilmaður í Manchester United á tímabilinu og hjálpaði liðinu að tryggja 2. sætið í ensku úrvalsdeildinni. Maguire missti aðeins af sex leikjum í ensku deildinni og Evrópudeildinni í vetur.

Leikmaðurinn hefur verið mikið gagnrýndur af fyrrum fyrirliða United, Roy Keane, og Robbie Savage síðasta árið og viðurkenndi Maguire í hlaðvarpinu The Overlap að þetta hafi áhrif á leikmenn.

„Já þetta hefur áhrif á menn, ég ætla ekki að sitja hér og ljúga. Allir hafa skoðun,“ sagði Maguire í hlaðvarpinu The Overlap.

„Auðvitað vilja allir heyra þá tala vel um okkur og að allt sé frábært, en það er ekki fótbolti og við verðum að sætta okkur við það.“

„Ég held að þetta hafi áhrif á sjálfstraust leikmanna, sérstaklega hjá þeim sem hlusta mikið á þetta.“

Eftir leik gegn Tottenham í lok síðustu leiktíðar sagði Keane í hálfleik að Maguire og De Gea ætti ekki að vera hleypt inn í liðsrútuna eftir frammistöðu þeirra. Sá leikur endaði 1-1.

„Mér býður við þessu. Ég myndi ekki hleypa þeim í liðsrútuna,“ sagði Keane á Sky Sports.

Þá sagði Savage að Maguire ætti ekki skilið að bera fyrirliðaband klúbbsins eftir 6-1 tap gegn Tottenham.

„United vörnin var úti um allt og það er enginn leiðtogi. Mörkin sem liðið fékk á sig voru virkilega slæm. Harry Maguire sem fyrirliði, í alvöru? Hann er fínn leikmaður en enginn fyrirliði Manchester United. Hann var eins og lítill skólastrákur í vörninni,“ sagði Savage á BT Sport.