Jordan Henderson, fyrirliði Liverpool, segir að honum hafi fundist leikmenn Leeds sýna honum og liðsfélögum sínum vanvirðingu með því að vera í bolum sem á stóð ,,verðskuldið það“ (e. Earn it) eftir að tilkynnt var um að Liverpool væri eitt af þeim liðum sem ætlaði sér að taka þátt í Ofurdeild Evrópu.

Tilraun tólf evrópskra stórliða til að stofna Ofurdeildina í síðasta mánuði var harðlega gagnrýnd. Leikmenn Leeds klæddust bolunum sem um ræðir er þeir hituðu upp fyrir leik gegn Liverpool þann 19. apríl. Þetta gerðu þeir til að mótmæla stofnun deildarinnar.

Henderson segir að þetta hafi verið ósanngjarnt af Leeds þar sem leikmenn Liverpool hafi ekki haft neitt með málið að gera.

,,Bolirnir sýndu vanvirðingu. Leikmennirnir gerðu ekkert af sér. Þetta var ekkert sem við vildum,“ sagði Henderson við New York Times. 

Fyrirliðinn tók sjálfur afstöðu gegn Ofurdeildinni og er sagður hafa unnið gegn stofnun hennar á bakvið tjöldin.