Töluvert ósætti hefur verið í knattspyrnusamfélaginu hér á landi vegna tíðra vandræða með vefsjónvarp Stöðvar 2 Sport í kringum Pepsi Max-deildirnar. Útsendingar hafa ekki alltaf byrjað á réttum tíma, þær hafa stundum hökt og nú síðast var lokað á útsendingu of snemma. Þetta var rætt í hlaðvarpsþættinum Dr. Football í gær.
,,Ég var að horfa í kvöld, settist fyrir framan sjónvarpið, eða reyndar Ipadinn klukkan 18:00 og horfði á toppslag á Dalvík, KA-Víkingur. Fínn leikur. Menn voru greinilega sáttir við einn punkt þegar það var flautað til leiks. Svo líður leikurinn, Víkingar komast yfir. Uppbótartími, 94 mínútur á klukkunni. Elli á FM (Erlendur Eiríksson) bendir á punktinn, vítapsyrna. Ég í þessu frábæra vefsjónvarpi. Pepsi Max-veröldin. Einhver slakasta veröld Íslands. Heyrðu, þá bara frýs allt. Það voru 94 og hálf sem var komið. Þeir hafa væntanlega bara gert ráð fyrir því að útsendingin væri kannski 100 mínútur eða 98, með uppbótartíma. Þá bara slökknar á Ipadnum. Ég þarf bara að gjöra svo vel að logga mig inn á úrslit.net hjá Sörens og félögum til að sjá hvað hafði gerst,“ sagði pirraður Kristján Óli Sigurðsson, einn sérfræðinga þáttarins, um reynslu sína af vefsjónvarpinu.
Arnar Sveinn Geirsson tók í svipaðan streng. ,Þetta er náttúrulega bara ítrekað í gangi í þessari ‘veröld’. Þetta er bara þjónusta sem fólk er að borga fyrir. Það er verið að bjóða upp á eitthvað. Það er verið að segja að það hafi aldrei verið meiri umfjöllun um íslenskan fótbolta, aldrei búið að gera betur en núna og þetta er það sem er verið að bjóða upp á.“
Hægt er að horfa á alla leiki í efstu deildum í knattspyrnu hér á landi í fyrsta sinn í ár. Marga þeirra má þó aðeins sjá á netinu. Kristján vill frekar sjá Stöð 2 Sport nýta hliðarrásir sínar í útsendingarnar.
,,Ég bara skil ekki. Er dýrara fyrir Sýn að vera með tómar sportstöðvar. Þeir eru með sport 1, 2, 3, 4 og jafnvel 5. Er dýrara að setja þetta inn á þær stöðvar?. Það eru endursýningar frá einhverjum körfuboltaleikjum sem eru tveggja vikna gamlir í staðinn fyrir að setja þessa leiki á? Það voru bara tveir í gangi á sama tíma.“
Að lokum bætti Kristján svo við ,,Drullast í gang. Standard takk.“
Þennan þátt Dr. Football má nálgast hér.
