Áslaug Munda Gunnlaugsdóttir ein efnilegasta knattspyrnukona landsins fékk COVID á síðasta ári, þrátt fyrir að vera í frábæru formi reyndist það erfitt fyrir þessa ungu konu að glíma við veiruna skæðu.

Áslaug Munda er 19 ára gömul en hún á framtíðina fyrir sér, hún var í íslenska landsliðshópnum sem mætti Ítalíu fyrr í þessum mánuði. Áslaug gat lítið verið með á síðustu leiktíð þegar Breiðablik varð Íslandsmeistari.

„Fyrir sumarið 2020 átti ég í miklum erfiðleikum með púlsinn minn og var ég að glíma við mikla þreytu við æfingar og daglegar athafnir. Það tók mig mjög langan tíma að ná mér en ég byrjaði að koma hægt og rólega inn í æfingar og leiki þegar líða fór á mótið,“ segir Áslaug í viðtali við Sæbjörn Steinke á Fótbolta.net.

Áslaug var að jafna sig eftir þetta áfall þegar hún meiddist og fékk svo ofan í það COVID-19.

„Ég kórónaði svo allt saman með því að enda tímabilið með Covid. Það er alltaf erfitt að sitja á hliðarlínunni og horfa á leiki en maður kann enn þá betur að meta leikinn þegar maður getur ekki tekið þátt í honum sjálfur,“ segir Áslaug.

Þrátt fyrir að vera ung og í frábæru formi tók það Áslaugu um þrjá mánuði að jafna sig af COVID.

„Ég var í um það bil þrjá mánuði eftir að hafa fengið Covid að geta almennilega hlaupið og hreyft mig án þess að vera þreytt. Ég fékk frekar mikið í lungun á æfingum og var kalda loftið í desember ekki að hjálpa,“ segir Áslaug í samtali við Fótbolta.net.

Áslaug lék með Hetti á Egilsstöðum áður en hún gekk í raðir Breiðabliks. Hún kláraði nám við Menntaskólann í Kópavogi á síðasta ári með meðaleinkunnina 9,27.