Á tíunda tímanum í gærkvöldi var maður í mjög annarlegu ástandi handtekinn í miðborginni. Hann er grunaður um eignaspjöll og vörslu fíkniefna. Hann var vistaður í fangageymslu.

Einn ökumaður var kærður fyrir of hraðan akstur í gærkvöldi en hann ók á 123 km/klst þar sem leyfður hámarkshraði er 80 km/klst. Viðkomandi er aðeins 17 ára og verður forráðamönnum hans og barnaverndaryfirvöldum því tilkynnt um málið.

Á þriðja tímanum var ökumaður handtekinn í Vesturbænum, grunaður um að vera undir áhrifum áfengis og fíkniefna. Tveimur klukkustundum áður var ökumaður handtekinn í Árbæ eftir að hann ók á móti einstefnu. Hann er grunaður um ölvun við akstur og akstur sviptur ökuréttindum.