Georginio Wijnaldum leikmaður Liverpool las yfir fréttamanni sem spurði hann út í mannréttindi í Katar í tengslum við rasisma í knattspyrnu.

Wijnaldum er í verkefni með hollenska landsliðinu en undankeppni HM 2022 hefst í dag, lokamótið fer fram í Katar í desember á næsta ári.

Wijnaldum hefur mikið rætt um rasisma í fótboltanum og sagt frá því að hann muni labba af velli ef leikmaður verður fyrir kynþáttaníði innan vallar. Pascal Kamperman blaðamaður hjá ESPN spurði hann hvort hann hefði sömu skoðun á því ef mannréttindi væru ekki virt í Katar.

„Ég hef hugsað um þessa spurningu, skilur þú hvað þú ert að gera,“ sagði Wijnaldum.

„Að bera rasisma saman við sögu í Katar, þú ert í raun að segja að rasismi gegn dökku fólki sé ekki ástæða til þess að standa upp og berjast gegn því.“

„Þú getur ekki borið þetta saman, ég hef hugsað þetta og þetta er furðulegt hjá þér,“ sagði Wijnaldum sem var augljóslega ansi reiður.

„Þú ert að segja að ef það gerist að ég upplifi rasisma innan vallar og gangi af velli, þá eigi ég að gera það á öðrum stað líka. Saga rasismans er allt öðruvísi.“

Reiðilestur Wijnaldum má sjá hér að neðan.