Aron Einar Gunnarsson fyrirliði íslenska landsliðsins er klár í slaginn gegn Þýskalandi á morgun í undankeppni HM, um er að ræða fyrsta leik í nýrri keppni undir stjórn Arnars Þórs Viðarssonar.

„Það er tilhlökkun að að byrja nýja keppni, það er spenna. Við skoðum alltaf okkar möguleika og hvernig við komumst upp úr riðlinum. Það er gaman að byrja nýja keppni og undirbúningurinn hefur gengið vel þrátt fyrir að við höfum verið stutt saman. Það eru nýir þjálfarar en undirbúningurinn hefur verið góður, það er reynsla í hópnum og við erum spenntir,“ sagði Aron Einar.

Aron Einar er í góðu formi og treystir sér til að spila þrjá leiki á næstu sex dögum. „Mér líður mjög vel en við tökum stöðuna eftir hvern leik. Eins og staðan er núna er ég í mjög góðu formi og enginn meiðsli. Við erum með gott læknateymi sem er til ái að gera þetta auka þegar menn koma illa út úr leik.“

Gylfi Þór Sigurðsson er fjarverandi en ástæðan að eiginkona hans á von á sínu fyrsta barni. „Ég veit hvernig honum líður, ég skil hann mjög vel og hef verið í sömu stöðu,“ sagði Aron Einar en hann á í dag þrjá stráka.

Aron Einar missti af fæðingu sonar síns árið 2015 þegar hann var staddur í verkefni með landsliðinu. Hann sá fæðinguna í gegnum FaceTime.  „Ég skil hann mjög vel, að vera viðstaddur fæðingu er það mikilvægasta sem ég hef verið í. Ég tala af reynslu að hafa ekki verið á staðnum, ég skil hann mjög vel. Ég óska honum og Alexöndru góðs gengis.“

Aron Einar er spenntur fyrir því að fara af stað með nýjum þjálfurum. „Það eru litlar áherslubreytingar, ég veit fyrir víst að Arnar og Eiður Smári eru ekki að koma inn í þetta til að gera miklar breytingar. Þeir vita hvað býr í þessum hóp.“