Taurus Confidence, súrálsskip með 19 manna áhöfn kom til Reyðarfjarðar í gær og lagði að Mjóeyrarhöfn. Tíu manns úr áhöfninni hafa greinst með Covid-19 smit en skipið var að koma frá Brasilíu og lagði að Mjóeyrahöfn þar sem álver Fjarðaráls er.
Í tilkynningu frá lögreglustjóranum á Austurlandi segir að skipstjóri hafi strax við komu gert grein fyrir að sjö manns í áhöfninni væru veikir. Að fenginni einkennalýsingu og öðrum faraldursfræðilegum þáttum var ákveðið að taka sýni úr allri áhöfninni, sem náðist undir kvöld í gær.
„Aðgerðastjórn og umdæmislæknir sóttvarna í samvinnu við umboðsmann útgerðarinnar og skipstjórann hafa gefið leiðbeiningar um sóttvarnaráðstafanir um borð. Læknisfræðilegt eftirlit með skipverjunum verður unnið samkvæmt fyrirliggjandi vinnureglum þar um af Covid-deild Landspítala og HSA. Sýnataka og allt annað tengt þessu hefur gengið vel og aðgerðastjórn telur ekki hættu á að smitið dreifi sér“, segir enn fremur í tilkynningunni.
Hinir smituðu eru allir í einangrun um borð og aðrir í sóttkví. Hefur svo verið frá komu skipsins til hafnar.