Lögreglustjórinn á Suðurnesjum krafðist nýlega gæsluvarðhalds yfir konu sem sökuð er um að hafa þrælað þremur stjúpbörnum sínum út í fyrirtæki sínu, hirt af þeim launin þeirra og ýmist sent peningana til útlanda eða eytt þeim í spilakassa. Í úrskurði Héraðsdóms Reykjaness í málinu í fyrradag segir meðal annars að faðir barnanna og þau sjálfa hafa verið samvinnufús við lögreglu og veitt aðgang að bankaupplýsingum. Þá segir enn fremur í úrskurðinum:

„Fyrir liggi framburður nefndra brotaþola og annarra vitna, sem renni stoðum undir þær grunsemdir að varnaraðili hafi notið fjárhagslegs ávinnings af meintum brotum gegn brotaþolum og hún um árabil látið börnin vinna gríðarlega mikið, en sjálf tekið laun þeirra og ýmist sent úr landi eða notað í t.d. spilakassa. Búið sé að afla dómsúrskurðar um afléttingu bankaleyndar á banka-og greiðslukortareikningum varnaraðila og beðið sé gagna frá alþjóðlegum peningasendingafyrirtækjum. Sjálf hafi börnin og faðir þeirra heimilað lögreglu að rannsaka reikninga í þeirra nafni. Sé nú verið að vinna úr þessum gögnum, sem og haldlögðum farsímum og fleiru sem fannst við nýgerða húsleit á heimili varnaraðila og starfsstöð. Við leitina á heimili hennar fundust meðal annars 835.000 krónur í reiðufé. Varnaraðili hafi svo verið handtekin í gær og færð til yfirheyrslu.“

Konan neitaði allri sök í yfirheyrslu hjá lögreglu.

Héraðsdómur féllst á þann málatilbúnað lögreglu að hætta væri á því að konan gæti torveldað rannsókn málsins ef hún gangi laus. Var því fallist á vikulangt gæsluvarðhald yfir henni.

Þennan gæsluvarðhaldsúrskurð felldi Landsréttur hins vegar úr gildi í morgun. Álítur Landsréttur að ekki séu til staðar rannsóknarhagsmunir sem krefjist þess að konan sitji í gæsluvarðhaldi.