Daniel Kinahan er ekki þekkt nafn innan fótboltans en hann er með mikil áhrif innan boxíþróttarinnar. Hann er einn ríkasti maður Írlands en hann hefur náð í auðæfi sín í gegnum eiturlyfjaviðskipti.

Daniel á umboðsskrifstofuna MTK Global og er með yfir 250 boxara á sínum snærum. Nýlega stofnaði hann nýja deild innan fyrirtækisins sem ber nafnið MTK Football og á sú deild að smala til sín fótboltamönnum á næstu árum.

Daniel er eftirlýstur í mörgum löndum vegna gruns um eiturlyfjasmygl en þessa dagana lifir hann góðu lífi í Dubai. Nafn hans finnst ekki á neinum pappírum innan MTK en hann er samt aðalmaðurinn þar og með nefið í öllu sem fram fer. Hann þekkir vel til margra fótboltamanna en hann hjálpaði þónokkrum leikmönnum í ensku úrvalsdeildinni um árið þegar þeir keyptu úr af manni sem sveik þá og hvarf með peninginn. Sum úrin kostuðu allt að 250.000 punda og því ekki um neina smáaura að ræða.

Áhrifamenn innan eiturlyfjaveldis Kinahan hafa náðst á mynd ásamt leikmönnum í ensku úrvalsdeildinni, þar á meðal Dele Alli og Troy Parrott, leikmenn Tottenham.