Owen Hargreaves, fyrrverandi leikmaður liða á borð við Manchester United og Bayern Munchen, hlær að því að Kylian Mbappé, leikmaður PSG og Erling Braut Haaland, leikmaður Dortmund séu bornir saman við Lionel Messi og Cristiano Ronaldo.

Talað hefur verið um að Mbappé og Haaland hafi nú tekið stað Messi og Ronaldo sem bestu leikmenn í heimi.

Að mati Hargreaves er langt í að Mbappe og Haaland geti fyllt upp í það skarð sem Messi og Ronaldo munu á endanum skilja eftir sig.

„Það verður ekki um það deilt að Mbappe og Haaland séu tveir af bestu ungu leikmönnum í heimi þessa stundina. Messi og Ronaldo hafa hins vegar verið bestir í mörg ár,“ sagði Hargreaves.

Frammistöður Haaland og Mbappé á tímabilinu, hafa vakið verðskuldaða athygli en Hargreaves vill ekki gera of mikið úr þessu öllu saman.

„Þangað til að þessir leikmenn geta gert það sem þeir eru að gera núna, fimm ár í röð, geta þeir ekki einu sinni verið nefndir í sama samtali og Messi og Ronaldo,“ sagði Owen Hargreaves.