Miðvikudaginn 17. mars mun Arnar Þór Viðarsson, landsliðsþjálfari A karla, tilkynna hóp liðsins fyrir leikina þrjá í mars. Þetta eru fyrstu leikir Íslands undir stjórn Arnars Þórs og eru þeir allir þrír liður í undankeppni HM 2022, en lokakeppnin fer fram í Katar.

Ísland mætir fyrst Þýskalandi, síðan Armeníu og endar svo á leik gegn Liechtenstein, en allir leikirnir fara fram ytra. Þess má geta að leikurinn gegn Þýskalandi verður leikur númer 500 hjá A karla.

Leikir Íslands í mars
Þýskaland – Ísland fimmtudaginn 25. mars á Schauinsland-Reisen Arena í Duisburg og hefst leikurinn kl. 19:45.
Armenía – Ísland sunnudaginn 28. mars á Vazgen Sargsyan Republican Stadium í Yerevan og hefst leikurinn kl. 16:00.
Liechtenstein – Ísland miðvikudaginn 31. mars á Rheinpark og hefst leikurinn kl. 18:45.

Davíð Snorri Jónasson, landsliðsþjálfari U21 karla, mun fimmtudaginn 18. mars tilkynna hóp liðsins fyrir lokakeppni EM 2021. Ísland er í riðli með Rússlandi, Danmörku og Frakklandi, en liðið leikur alla leiki sína í Györ í Ungverjalandi. Tvö efstu lið riðilsins fara áfram í 8-liða úrslit keppninnar, en þau fara fram í Ungverjalandi og Slóveníu í júní.

Liðið hefur leik sinn á mótinu þann 25. mars þegar það mætir Rússlandi, næst leika strákarnir gegn Danmörku og enda svo riðlakeppnina á leik gegn Frakklandi. U21 karla tók síðast þátt í lokakeppni EM árið 2011 og var grátlega nálægt því að fara áfram í 8-liða úrslit. Sviss endaði riðilinn með fullt hús stiga, en Hvíta-Rússland, Ísland og Danmörk voru öll jöfn að stigum og með sömu markatölu í 2.-4. sæti riðilsins. Hvíta-Rússland fór áfram í 8-liða úrslitin þar sem liðið var með bestan innbyrðis árangur gegn Íslandi og Danmörku.

Leikir Ísland á EM
Ísland – Rússland fimmtudaginn 25. mars á Gyirmóti Stadion í Györ og hefst hann kl. 17:00
Ísland – Danmörk sunnudaginn 28. mars á Gyirmóti Stadion í Györ og hefst hann kl. 13:00
Ísland – Frakkland miðvikudaginn 31. mars á Gyirmóti Stadion í Györ og hefst hann kl. 16:00