Aston Villa og Wolves mættust á Villa Park í ensku úrvalsdeildinni í dag. Fyrir leikinn voru Úlfarnir í tólfta sæti deildarinnar, 5 stigum á eftir Aston Villa sem sitja í því níunda. Villa-menn eiga þó tvo leiki til góða.
Bæði lið sakna sinna bestu leikmanna en Jack Grealish, vængmaður Aston Villa, og Raul Jimenez, framherji Wolves, eru báðir meiddir og gátu ekki spilað í dag. Grealish hefur ekki spilað síðan 13. febrúar en Jimenez er að jafna sig eftir alvarleg höfuðmeiðsli sem hann hlaut í lok nóvembermánaðar.
Ekkert mark var skorað en bæði lið fengu nóg af færum til að skora. Miðverðir beggja liða voru í aðalhlutverki í sóknarleiknum og fengu þeir allir fjórir kjörin tækifæri til að skora. Roman Saiss, miðvörður Wolves, fékk besta færi leiksins þegar hann fékk boltann um 30 sentimetrum frá opnu marki en náði á ótrúlegan hátt að koma boltanum yfir markið.
Eitt stig gerir lítið fyrir bæði lið en bæði vilja koma sér ofar í töflunni til að geta barist um Evrópusæti.
