Gianluigi Buffon, markvörður ítölsku meistaranna Juventus, gæti lagt markmannshanskana á hilluna í sumar. Þetta kom fram í viðtali kappans við The Guardian.

Áætlanir Buffon miðast við að halda áfram að spila þangað till árið 2023, þegar hann verður orðinn 45 ára en hann gæti þó hætt eftir fjóra mánuði.

„Í huga mínum er ég farinn að sjá endastöðina á mínum knattspyrnuferli. Algjör lokapunktur á mínum ferli er árið 2023 en ég gæti einnig ákveðið að hætta að spila eftir fjóra mánuði,“ sagði Gianluigi Buffon.

Buffon hafði áður íhugað að leggja markmannshanskana á hilluna eftir tímabilið 2017-2018 þegar samningur hans við Juventus rann út. Hann samdi hins vegar við franska liðið Paris-Saint Germain á þeim tíma áður en hann gekk síðan aftur til liðs við Juventus sumarið 2019.

Buffon er næst leikjahæsti leikmaðurinn í sögu Juventus, alls hefur hann spilað 681 leik fyrir félagið. Hann hefur á ferli sínum spilað yfir 1000 knattspyrnuleiki, orðið heimsmeistari með Ítalíu og unnið ítölsku úrvalsdeildina tíu sinnum með Juventus.