Læknir belgíska landsliðsins, hefur lýst yfir miklum áhyggjum varðandi Eden Hazard og hans meiðslavandræði. Hazard meiddist enn og aftur á dögunum og verður frá í að minnsta kosti sex vikur.

Kristof Sas, er læknir belgíska landsliðsins og hann var til viðtals hjá belgíska blaðinu Nieuwsblad á dögunum.

„Við erum að bíða frekari fregna af Hazard en það er ljóst að þetta er mikið áhyggjuefni. Yfirleitt valda meiðsli á þessum tímapunkti okkur ekki miklum áhyggjum fyrir Evrópumótið en þetta er öðruvísi með Hazard,“ sagði Kristof Sas, læknir belgíska landsliðsins.

Hazard hefur verið að glíma við langvarandi meiðsli og hefur aldrei náð að sýna sitt rétta andlit með Real Madrid eftir að hann gekk til liðs við liðið frá Chelsea fyrir 130 milljónir punda árið 2019.

„Hazard er í vítahring og það er erfitt að komast út úr honum, vöðvameiðslin núna eru áhyggjuefni. Knattspyrnumaður verður að geta sparkað, snúið, hoppað, allt á miklum hraða,“ sagði Kristof Sas, læknir belgíska landsliðsins í samtali við Nieuwsblad.

Hazard var frá í sex vikur fyrr á leiktíðinni, þá greindist hann einnig seinna meir með Covid-19 og var frá í tvær vikur til viðbótar.