Fréttatími Stöðvar 2 verður frá og með 18. janúar í læstri dagskrá og aðeins aðgengilegur áskrifendum. Þetta kemur fram í tilkynningu frá Stöð 2. Segir þar að Stöð 2 verði „hrein áskriftarstöð.“
Fréttatími Stöðvar 2 hefur verið opinn almenningi síðan stöðin var stofnuð fyrir 34 árum síðan og er því um býsna veigamikla breytingu á fjölmiðlaumhverfi Íslands að ræða. Þórhallur Gunnarsson, framkvæmdastjóri fjölmiðla Stöðvar 2 segir í tilkynningunni breytinguna vera „sóknaraðgerð.“ „Með þessari aðgerð erum við að tryggja fréttastofuna enn frekar í sessi. Við erum þess fullviss að með stuðningi áskrifenda skapist forsendur til að standa vörð um öfluga fréttaþjónustu og framleiðslu innlends efnis.“
Í tilkynningunni segir jafnframt að sveigjanleiki í áskriftarmöguleikum verði aukinn samhliða þessari breytingu. Þá verður efni úr fréttatíma áfram aðgengilegt á fréttavef Vísis og í fréttum Bylgjunnar, að því er segir í tilkynningunni.
