Síðdegis í gær var tilkynnt um innbrot í heimahús í Bústaðahverfi. Fjögur mál komu inn á borð lögreglu þar sem fólk var staðið að þjófnaði úr verslunum. Í tveimur þeirra voru gerendurnir á unglingsaldri og voru málin leyst með aðkomu foreldra þeirra.

Á níunda tímanum var ekið á ljósastaur í miðborginni. Hann skemmdist en engin slys urðu á fólki.

Þrír ökumenn voru handteknir í gærkvöldi og nótt, grunaðir um að vera undir áhrifum fíkniefna. Bifreið eins þeirra reyndist vera með stolin skráningarnúmer auk þess sem ökumaðurinn reyndist vera sviptur ökuréttindum. Annar ökumaður reyndist einnig vera sviptur ökuréttindum. Í bifreið hans fundust meint fíkniefni og hnífar. Farþegi í bifreiðinni var með meint fíkniefni á sér og hníf.