Birt hefur verið ákæra gegn ungum manni, fæddum árið 1996, í Lögbirtingablaðinu, þar sem ekki hefur tekist að birta honum ákæruna. Maðurinn er sakaður um alvarlega líkamsaárás í Vestmannaeyjum í janúar árið 2019, nánar tiltekið við Höllina í Strembugötu.

Hinn ákærði er sagður hafa ráðist á mann sem fæddur er 1997 og slegið hann hnefahöggi í andlitið. Síðan hlaupið manninn uppi og hoppað á hann þannig að hann féll til jarðar. Síðan slegið hann ítrekað í andlit og líkama. Maðurinn hlaut af þessu mar og bólgu á miðju enni, bólgu, mar og smá skrámur á nefi, sprungu og smá sár á neðri vör, bólgu og eymsli yfir vinstra kinnbeini og eymsli í vinstri kjálka.

Þess er krafist að hinn ákærði verði dæmdur til refsingar og greiðslu alls sakarkostnaðar. Í tilkynningunni segir enn fremur: „Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það hann er ákærður fyrir og dómur verði lagður á málið að honum fjarstöddum.“

Málið verður tekið fyrir í Héraðsdómi Suðurlands þann 11. febrúar 2021.