Saga Garðarsdóttir, leikkona og grínvalkyrja með meiru, er ferskur blær í sótthreinsuðu jólaamstrinu. Saga prýðir forsíðu Jólablaðs DV sem kom út í morgun. Í viðtalinu ræðir Saga staðalímyndir og kynjahlutverk af sinni alkunnu snilld, íþróttablæti sitt, fæðingar, interrail og gleðina sem fylgir góðum sleik. Ætla má að þetta viðtal sé líklega eitt skemmtilegasta viðtal ársins.
Saga elskar sund og eru þau hjónin og hin tæplega þriggja ára hamingjusprengja Edda ekki óalgeng sjón í Vesturbæjarlauginni en það var ein-mitt þar sem Saga sá eiginmann sinn, Snorra Helgason tónlistarmann, fyrst. „Ég var búin að taka eftir Snorra áður og þá sérstaklega hvað hann var alltaf glaður. Ég var búin að dást að honum í svona hálft ár áður en nokkuð gerðist. Snorri er svo beinskeyttur. Það sló mig dálítið út af laginu hvað hann gekk hreint til verks. Það er venjulega ég sem geri það og ég varð eiginlega bara feimin. Hann náði eiginlega bara í mig.
Snorri var að vinna á skemmtistaðnum Húrra og hann bauð mér heim með sér eitt kvöldið og mér fannst það svo frakkt og dónalegt að ég svaraði: Nei, því miður, ég veit ekki hvað klukkan er! Ég þóttist bara hafa misskilið hann. Ég drakk ekki áfengi á þessum tíma,“ segir Saga og hlær.
„En ég fór nú samt heim með honum eftir að ég var búin að anda í bréfpoka,“ segir Saga og síðan eru liðin sex ár, Snorri og Saga orðin hjón og eiga dóttur og fallegt heimili í Vesturbænum. Þau hafa orð á sér fyrir að vera einstaklega samrýnd og sjást oftar en ekki saman – og ósjaldan að kyssast.
„Ég segi að fólk eigi að fara meira í sleik! Ég man reyndar að við vorum ekki búin að vera lengi saman þegar frænka mín ávítaði mig fyrir að fara í sleik í einhverri skírn, sem henni fannst ekki vera í lagi. Ég bara tengdi ekki við það og skildi bara ekki hvernig það var óviðeigandi að fagna lífinu með sleik. Ég var ekkert að hugsa um að þetta væri óviðeigandi – heldur bara mikið er þetta gott móment,“ segir Saga og hlær björtum hlátri.
„Þetta var líka maðurinn minn, ekki bara einhver maður í skírn. Það hefði verið skrítið.“
Jólablað DV er sérstaklega girnilegt í ár – 56 síður og stútfullt af góðu gríni, fréttum og jafnvel uppskriftum af bestu jólasósunum.
Förðun: Elín Reynisdóttir
Stílisti: Eva Signý Berger
Myndir: Anton Brink
