Fleiri staðfest tilvik COVID-19 hafa greinst meðal starfsmanna Háskóla Íslands, annað þeirra hjá starfsmanni í Hámu, matsölu skólans.
Í tölvupósti Jóns Atla Benediktssonar, rektors til nemenda segir.
„Því miður hafa komið upp tvö ný staðfest COVID-19 smit hjá starfsfólki á háskólasvæðinu.
Smit hefur verið staðfest hjá starfsmanni í Setbergi – húsi kennslunnar og hjá starfsmanni Hámu á Háskólatorgi.“
Allir starfsmenn Hámi hefur verið sett í sóttkví og veitingastaðnum hefur verið lokað tímabundið. Smitrakningarteymi almannavarna metur þó áhættu viðskiptavina Hámu óverulega og þurfa þeir ekki að fara í sóttkví.
Rektor hvetur nemendur til að nýta sér gjaldfrjálsa sálfræðiþjónustu Háskólans ef þeir telja þörf á.
Eins telur hann brýnt að ráðstefnur, málþing og fundir verði alfarið með rafrænum hætti.
„Verði ekki komist hjá því að hittast skal gæta ítrustu varkárni og helst að bera andlitsgrímur. Þá hvet ég nemendur og starfsfólk eindregið til að fresta eða fella niður allt samkomuhald á Háskólasvæðinu.“
Í gær var greint frá því að Jón Atli rektor sé kominn í sóttkví auk tveggja starfsmanna Aðalbyggingar Háskóla Íslands eftir að smit greindist hjá starfsmanni um helgina.
Jón Atli hvetur nemendur til að huga að smitvörnum og fylgja reglum almannavarna til hins ítrasta. Eins hvetur hann nemendur og starfsfólk til að nota smitrakningarappið.
„Það er vissulega afar leitt að þessi staða sé komin upp en við vitum að þetta er tímabundið og samstaða okkar hefur aldrei verið mikilvægari en nú til að sigur vinnist.
Hugum hvert að öðru og beinum sjónum að því jákvæða í tilverunni“