Sigga Dögg kynfræðingur fór í brasilískt vax í beinni á Instagram í dag. Hún gaf DV góðfúslegt leyfi til að deila myndbandinu með lesendum.

Sigga Dögg spyr Ernu snyrtifræðing að algengum spurningum þegar kemur að vaxi. Eins og hvernig er að fara í fyrsta skipti í vax, um ástæður þess að konur fara í vax, gyllinæð og femíníska skömm.

Sigga Dögg vill leggja áherslu á að brasilískt vax sé val en ekki skylda. Þær ræða meðal annars um þegar konur fara í vax án þess að virkilega vilja það, heldur til dæmis til að þóknast maka sínum. Erna nefnir dæmi um konu sem kom til hennar en endaði með að hætta við eftir gott og hreinskilið spjall. Síðan ræða þær um „femíníska skömm“ þess að fara í vax.

„Mér finnst þessi femíníska skömm komin á svo skrýtið plan. Í minni sannfæringu hélt ég að femínismi snerist um að þú mátt gera það sem þú vilt án þess að hafa einhverja skömm,“ segir Erna og heldur áfram:

„Af hverju þarft þú sem femínisti að skammast þín því þú ferð í vax? Við erum alveg að lenda í því að harðir femínistar hafi snúið þessu þannig að þeir eigi að vera með hár. Þannig þeir eru nánast að koma inn með huldu höfði og vilja ekki láta neinn vita. Ég segi alltaf: Er ekki partur af því að vera femínisti að gera einmitt það sem þú vilt gera, í þinni sannfæringu. Er það ekki sem baráttan snýst um, að þú sem einstaklingur hafir rétt til að gera það sem þú vilt?“

Þær ræða um margt og mikið eins og hvað á að gera eftir vax og að engin píka sé eins. „Þetta er bara eins og andlit, það er enginn eins,“ segir Erna.

Karlmenn eru einnig velkomnir í vax og segir Erna að það sé ein á stofunni sem sérhæfir sig í að vaxa karlmenn.

Horfðu á myndbandið hér að neðan.

https://www.instagram.com/p/CFJ6I1VgJz6/