Sara gekk í sumar til liðs við franska liðið Lyon en fyrir það spilaði hún með þýska liðinu Wolfsburg. Sara mætti sínum gömlu liðsfélögum í úrslitaleik Meistaradeildarinnar í gærkvöldi og vann leikinn. Sara tryggði sigur Lyon með marki á lokamínútum leiksins.
Þegar leikurinn var flautaður af og Sara var orðinn sigurvegari þá fagnaði hún vel enda stór áfangi að sigra Meistaradeildina. En svo áttaði hún sig á því að hún væri að fagna gegn sínum gömlu samherjum. „Ég var búin að hugsa um það fyrir leikinn að svona aðstæður gætu komið upp en maður verður að fara bara eftir tilfinningunum sínum,“ sagði Sara í samtali við Vísi um atburðarrásina eftir leikinn.
„Ég sýndi stelpunum í Wolfsburg auðvitað mikla virðingu í leiknum, fyrir hann og eftir leik. Mér fannst ekkert að því að fagna. Eftir leik fór ég til Pernille og knúsaði hana, og hún sagði bara „til hamingju, þú átt þetta skilið“. Það er erfitt að segja eitthvað á svona stundu en ég labbaði þarna um og tók utan um leikmennina og starfsliðið hjá Wolfsburg.“
Sara veit hvað það er erfitt að tapa í úrslitaleik en hún tapaði í úrslitaleik Meistaradeildarinnar með Wolfsburg gegn Lyon árið 2018. „Ég veit best sjálf hvað þær hafa lagt á sig til að komast í úrslitaleikinn, og hversu mikið þær vildu vinna. Ég veit líka hvernig er að tapa úrslitaleik. Það var leiðinlegt að sjá þær og ég fann til með þeim,“ sagði Sara.
Eftir leikinn knúsaði Sara vinkonu sína og fyrrum liðsfélaga, Pernille Harder. Myndband og myndir af þessu hafa vakið mikla athygli á samfélagsmiðlum en Pernille deildi meðal annars sjálf mynd af því þegar þær knúsuðust eftir leikinn. „Til hamingju,“ skrifaði Pernille með myndinni á Instagram-síðu sinni . „Við söknum þín gífurlega mikið. Við elskum þig.“
