Eiríkur Brynjólfsson er látinn, 69 ára að aldri, eftir stutta en snarpa baráttu við illvígan sjúkdóm. Kvaddi hann þennan heim síðastliðinn sunnudag. Greint var frá andláti hans í Morgunblaðinu í dag auk þess sem ástvinir hans hafa ritað eftirmæli um hann á samfélagsmiðlum undanfarið.

Eiríkur á fjölbreyttan og merkan feril að baki sem kennari, kennslustjóri, rithöfundur og þýðandi með meiru. Hann sendi frá sér smásagnasöfn og ljóðabækur auk þýðinga á erlendum skáldsögum, til dæmis norrænum glæpasögum. Skáldskapur Eiríks ber meðal annars vitni um orðheppni og djúpan málskilning.

Hann var foringi Hins íslenska glæpafélags frá árinu 2007. Það er félag rithöfunda og áhugamanna um glæpasögur. Félagið hefur starfað ötullega að vexti og viðgangi glæpasagnaritunar, meðal annars með verðlaunum og upplestrum.

Eiríkur var knattspyrnuáhugamaður og dyggur stuðningsmaður KR.

Jarðarför Eiríks Brynjólfssonar fer fram föstudaginn 28. ágúst, klukkan 15:00, í Fossvogskirkju. Vegna aðstæðna þarf að takmarka fjölda þeirra sem komast til að kveðja hann en hlekkur á streymi frá jarðarförinni verður auglýstur síðar á Facebook-síðu hans.

DV sendir fjölskyldu og vinum Eiríks Brynjólfssonar innilegar samúðarkveðjur.