Hin tvítuga Rut Þorbjörnsdóttir varð fyrir þeirri óskemmtilegri reynslu að vera áreitt kynferðislega í verslun Hagkaups í Skeifunni. „Ég stóð í ilmvatnsdeildinni, að prófa ilmvötn, þegar hann gengur að mér, stendur fyrir framan mig, horfir á mig og grípur svo í rassinn á mér.“ Rut segist hafa verið agndofa í nokkrar sekúndur enda alls ekki átt von á að verða fyrir slíku. „Svo spurði ég hann hvern andskotann hann væri að gera.“ Á maðurinn þá að hafa gengið í burtu frá Rut, sem var í Hagkaup að kaupa sér gos með pizzu sem hún var að bíða eftir að yrði tilbúin. Rut segist svo hafa rankað við sér dregið upp símann og náð honum við útgang verslunarinnar. Þar tók Rut upp meðfylgjandi myndband.
https://vimeo.com/441657848
Á myndbandinu heyrist Rut segja við manninn á meðan hann gengur framhjá henni og rakleitt út úr versluninni, „ekki fokking grípa í rassinn á stelpum í miðri fokking búð.“
Rut sagði við blaðamann DV að hún væri langþreytt á áreiti sem þessu, „ég skil ekki hvernig þetta gerist ennþá í nútíma samfélagið, það er 2020!“ Rut segist glöð að vekja athygli á hegðun sem þessari sem sé alltof algeng.
Aðspurð hvort Rut hafi lent í svona löguðu áður svarar hún einfaldlega: „Jesús minn já! Ég vann á bar og maður lendir í svona löguðu oft á djamminu, oft mikið verra en þetta.“ Rut segir að opnari umræða um hegðun sem þessa sé af hinu góða og því miður sé þetta enn alltof algengt og að það hafi fengið að líðast alltof lengi.
