Klúr texti sem Ólafur Helgi Kjartansson, lögreglustjóri á Suðurnesjum, prentaði út í sameiginlegum prentara á lögreglustöðinni varð til þess að þolinmæði annar starfsfólks brast. Þetta kom fram í kvöldfréttum RÚV.
Í gær var greint frá því að Áslaug Arna Sigurbjörnsdóttir dómsmálaráðherra hafi lagt til við Ólaf Helga Kjartansson, lögreglustjórann á Suðurnesjum, að hann hætti störfum. Frekari upplýsingingar um aðdraganda þess voru þó heldur óljósar.
Tveir starfsmenn hafa kvartað undan framgöngu lögreglustjórans og aðrir tveir undan einelti af hálfu tveggja yfirmanna hjá embættinu. Það er því spennuþrungið ástand á vinnustaðnum.
Þá segir í fréttinni að textinn í skjalinu klúra virðist hafa verið hluti af lengra skjali en pappírinn klárast áður en tókst að klára prentun þess. Afgangur skjalsins birtist því næsta starfsmanni sem setti pappír í prentarann. „Skömmu síðar barst trúnaðarmanni erindi frá starfsmanni sem taldi póst lögreglustjórans með öllu óviðeigandi og sérstaklega að tölvubúnaður embættisins væri notaður til skrifa eða prenta slíkan texta. Erindi starfsmannsins hafnaði síðan í dómsmálaráðuneytinu. Fréttastofa hefur líka heimildir fyrir því að lögreglustjórinn eigi til að hafa fataskipti fyrir opnum tjöldum á skrifstofu sinni, og hafi þannig sært blygðunarkennd starfsfólks,“ sagði í kvöldfréttum RÚV.
