„Eitt að því leiðinlegra sem ég geri í mínu starfi er að taka við tilkynningum þar sem skemmdir hafa verið unnar á eigum bæjarins,“ segir Guðlaugur Helgi Sigurjónsson, sviðsstjóri hjá Reykjanessbæ. Hann hefur undanfarið deilt myndum af sorglegum skemmdarverkum í íbúahópi Reykjanesbæjar.

Eins og meðfylgjandi myndir bera með sér hafa verið unnin mikil skemmdarverk á Landsnámsdýragarði sem staðsettur er við Víkingaheima í Innri-Njarðvík. Garðurinn er opnaður á listahátíð barna í Reykjanesbæ ár hvert. Raunar var ákveðið að opna garðinn ekki í sumar heldur geyma það  til betri tíma. „Þá fáum við þessar myndir af skemmdarverkum þar,“ segir Guðlaugur í stuttu spjalli við DV.

Í hinum enda bæjarins, hjá Duus-húsum í Keflavík, hafa líka verið unnin leiðinleg skemmdarverk. „Þarna voru hengirúm sem voru mjög vinsæl hjá krökkum og fullorðnum. En þau voru skorin og brennd,“ segir Guðlaugur. Var ákveðið að taka hengirúmin niður. „Þetta er alveg galið,“ segir Guðlaugur um þessa skemmdaráráttu þar  sem athæfi örfárra eyðileggur ánægju allra hinna, fyrir utan að valda kostnaði.

Guðlaugur biður bæjarbúa um að hugsa sinn gang hvað þetta varðar og ef börn og unglingar eiga í hlut sé mikilvægt að foreldrar ræði þetta við börn sín. „Það þarf virkilega að kenna börnum og unglingum að lagfæringar á skemmdum á eigum bæjarins koma úr vösum okkar foreldranna.“

Guðlaugur segir jafnramt að sú viðleitni hans að opinbera þessi skemmdarverk eigi að hafa forvarnargildi. Nú fari í hönd tími þar sem bæjarfélagið sé sérlega viðkvæmt fyrir áráttu skemmdarvarga:

„Við settum af stað átaksverkefni sem heitir Hughrif, þetta er listrænt þenkjandi hópur sem hefur unnið fullt af skemmtilegum hlutum í sumar, sem verið að setja á tún og opin svæði, í dag og á morgun,“ segir Guðlaugur sem vonast til að þessir hlutir verði ekki skemmdarfýsn að bráð og ítrekar hvatningu sína til bæjarbúa um að vakna til vitundar um skemmdarverk og vinna gegn þeim með opinni umræðu, sem og samtali foreldra við börn sín.