Dr. Sigrún Sigurðardóttir hefur verið ráðin sem aðstoðarrektor Kvikmyndaskóla Íslands. Hefur hún störf þann 1. september. Staða aðstoðarrektors er ný staða við skólann. Sigrún er núverandi dósent á Heilbrigðisvísindasviði við Háskólann á Akureyri.

Doktor í hjúkrunarfræði

Sigrún er doktor í hjúkrunarfræði frá Háskóla Íslands. Sérsvið hennar eru sálræn áföll, ofbeldi og áfallamiðuð nálgun. Hún hefur unnið mikilvægt frumkvöðlastarf á sínu sviði. Sigrún var ein af stofnendum og fyrsti formaður Krabbameinsfélags Sigurvonar á Norðanverðum Vestfjörðum.

Sigrún var ein af stofnendum Rannsóknarmiðstöðvar gegn ofbeldi við Háskólann á Akureyri árið 2011 og situr þar í stjórn. Hún situr í stjórn Bjarmahlíðar, miðstöðvar fyrir þolendur ofbeldis á Akureyri. Hún var annar af stofnendum Samtaka um stuðningssetur fyrir ungt fólk, sem stofnuð voru í september 2018.

Stjórnarformaður Bergsins headspace

Hún tók þátt í þróun fagvinnu fyrir opnun Bergsins headspace og var formaður fagráðs. Bergið headspace er stuðnings- og ráðgjafasetur fyrir ungt fólk sem sinnir nú ríkri þörf. Sigrún er núverandi stjórnarformaður samtakanna.

Sigrún hefur reynslu af alþjóðlegu samstarfi á sínu sviði og er í samstarfi í norðurslóðaverkefnum og tengslanetum. Sigrún hefur birt 15 ritrýndar fræðigreinar, bæði ein og með fleirum. Frá 2012 hefur hún kennt, þróað námskeið og haldið ráðstefnur við Háskólann á Akureyri. Námskeið hennar á meistarastigi Sálræn áföll og ofbeldi, er eitt fjölmennasta og vinsælasta námskeiðið í framhaldsnáminu við HA.

Sigrún útskrifaðist sem lögregluþjónn frá Lögregluskóla Ríkisins árið 1993 og starfaði sem lögreglukona um árabil.

Alls bárust 35 umsóknir um starf aðstoðarrektors. Fimm umsækjendur voru metnir hæfir.